Baaq ku aaddan Wakiillada Cadaaladda ku Dhisan ee Shirka Dib-u-heshiisiinta Doorashada 2026 ee Soomaaliya
Ayrotv.com- Muqdisho, Soomaaliya (01 April 2025) – Aniga oo ah Dr. Cabdillaahi Xaashi Abiib, Hoggaamiyaha Isbahaysiga Dimuqraadiga Soomaaliya iyo Xildhibaan ka tirsan Golaha Shacabka, waxaan soo dhaweynayaa baaqa Madaxweynaha Jamhuuriyadda Federaalka Soomaaliya ee ku aaddan dib-u-heshiisiin siyaasadeed. Si kastaba ha ahaatee, si dib-u-heshiisiintaasi ay u noqoto mid macno leh oo sharciyad leh, waa in ay ka qaybgalaan dhammaan daneeyeyaasha siyaasadeed ee ka kala socda gobollada kala duwan ee Soomaaliya.
Haddaba, aniga oo arrintaas garwaaqsan, waxaan si degdeg ah oo shuruud la’aan ah u dalbanayaa in aan kursi rasmi ah ku yeesho kulamada dib-u-heshiisiinta iyo wada-hadallada ku saabsan doorashada 2026 ee Soomaaliya. Dalabkan waxaan u jeedinayaa (i) Bulshooyinka la hayb-sooco, (ii) Barakacayaasha gudaha, (iii) Dhibbanayaasha cadaaladda la’aanta nidaamsan, (iv) Kooxaha aan fursadda haysan, (v) Dhalinyarada, iyo (vi) Shacabka Gobollada Awdal iyo Gebiley (Dawladda Awdal).
Muddo saddex sano ah, waxaan si hagar la’aan ah ugu adeegayay bulshooyinkan iyo tabashadooda. Waxay i maamuuseen kalsoonidooda, anigana waa waajib igu ah in aan xaqiijiyo in codkooda iyo xuquuqdooda siyaasadeed la ixtiraamo oo la aqoonsado.
Baaq ku aaddan Cadaaladda iyo Wakiillada Saxda ah – Doorashada 2026 waa in ay wax ka qabataa musuqmaasuqa baahsan ee sababay in hantida dadweynaha loo adeegsado boobka doorashooyinka. Kuwa mas’uulka ka ah xadgudubyadaas waa in la horkeenaa cadaaladda, iyadoo loo marayo hanaan daah-furan. Sidoo kale, bulshooyinkii horey looga takooray saamigooda siyaasadeed waa in ay helaan wakiillo cadaalad ah oo ay xaq u leeyihiin, iyada oo aan la isir-takoorin.
Bulshooyinkaas waxay sanado badan la daala-dhacayeen go’doomin siyaasadeed, dulmi nidaamsan, iyo cadaalad-darro doorasho. Xaaladdani waxay kasii dartay xilligii xukuumadda hadda jirta, taas oo awood dheeraad ah siisay qabiil gooni u xusul-duubtay gooni-isu-taagga, halka ay xaq-darrada ku fogeysay bulshooyinka kale.
Doorashooyin badan oo hore, shacabka Gobollada Awdal iyo Gebiley waxaa si arxan-darro ah loogu takooray hannaan siyaasadeed oo eex iyo hagardaamo ka buuxaan. Hoggaanka federaalka ee Soomaaliya, iyagoo aan laheyn faham taariikheed iyo tixgelin xuquuqeed, waxay shacabkaasi si joogto ah ugu dhiidhiyeen. Waxaa taa ka sii daran in hoggaanka Soomaaliya ay u oggolaadeen qabiilka gooni-goosadka ah inuu xukumo aayaha matalaadda siyaasadeed ee Awdal State, taas oo ah jabin cad oo ka dhan ah xaqa aayo-ka-tashiga.
Dhamaadka Xadgudubyada Siyaasadeed – Eexda dowladda federaalka ee Soomaaliya waxay abuurtay hannaan siyaasadeed oo cadaalad-darro ah, halkaas oo qabiilka gooni-goosadka ahi uu ku helay 61% kuraasta Dirta Waqooyi ee Golaha Shacabka iyo 72% kuraasta Dirta Waqooyi ee Golaha Aqalka Sare. Intaa waxaa dheer, hoggaanka qabiilkaasi wuxuu helay awood buuxda oo sharci-darro ah oo uu ku go’aaminayo cidda la dooran karo iyo cidda aan la dooran karin ee Gobollada Awdal iyo Gebiley – taas oo ah xadgudub lagu sameeyay xaqa siyaasadeed iyo sharafta dadkan.
Dhulmigaas waa in uu si degdeg ah u dhammaadaa. Shacabka Dawladda Awdal waxay si buuxda u dalbanayaan in ay iyagu si madaxbannaan u go’aamiyaan 9-ka kursi ee Golaha Shacabka iyo 2-da kursi ee Aqalka Sare iyada oo aan wax faragelin ah lagu sameynin. Sidoo kale, Beesha Ciise ee Gobolka Awdal waa in loo oggolaado xaq buuxa oo ay si toos ah ugu maamulaan 8 kursi ee Golaha Shacabka iyo 1 kursi ee Aqalka Sare ee doorashada 2026. Haddii la isku dayo in matalaadooda la xadido iyada oo aan oggolaanshahooda la helin, waa arrin cad oo ka dhan ah karaamadooda iyo xuquuqdooda asaasiga ah.
Fariin Cad oo Ku Socota Dowladda Soomaaliya iyo Beesha Caalamka – Isbahaysiga Dimuqraadiga Soomaaliya iyo bulshooyinka aan matalo ma sii aqbali doonaan dulmiga, takooridda siyaasadeed, iyo cadaaladda la’aanta nidaamsan. Muddo dheer, hoggaanka Soomaaliyeed wuxuu iska indha-tiray xaqiiqadan, halka kuwo kale la siiyay awood siyaasadeed oo aan la xadidin. Dulmigaas waa in uu dhammaadaa. Doorashada 2026 waa in ay noqotaa mid xor iyo xalaal ah oo ay ka wada qayb-qaataan dhammaan bulshada Soomaaliyeed. Haddii aan si buuxda oo rasmi ah looga qaybgelin bulshooyinkii la xaqiray, doorashadaasi ma noqon doonto mid sharciyad leh.
Waxaan ugu baaqayaa saaxiibbada caalamiga ah, hoggaanka mucaaradka, dowladaha federaalka iyo maamul goboleedyada, iyo dhammaan daneeyeyaasha siyaasadeed ee Soomaaliya in ay aqoonsadaan dhibaatadan siyaasadeed ee muddo dheer taagnayd, ayna qaadaan tallaabo lagula dagaallamayo dulmigaas. Mustaqbalka Soomaaliya waa in lagu dhisaa cadaalad, sinnaan, iyo hannaanka dimuqraadiyadeed – ma aha musuqmaasuq, eex, iyo takoorku.
Sidaas darteed, waxaan si cad oo aan gorgortan lahayn u dalbanayaa in aan kursi rasmi ah ku yeesho shirka dib-u-heshiisiinta soo socda, si loo xaqiijiyo in codadka shacabka Dawladda Awdal iyo bulshooyinka la hayb-sooco la maqlo, la ixtiraamo, oo si dhab ah loogu metelo. Arrintani ma ahan codsi – waa xaq aan la gorgortami karin.
Dhamaad
@golaha_shacabka
@StateDept
@HassanSMohamud
@TheVillaSomalia
@HamzaAbdiBarre
@AadanMadobe
@SomaliainQatar
@MOFAKuwait
@UAEinSomalia
@ChineseSomalia
@KSAmofaEN
@US2SOMALIA
@EU_in_Somalia
@ItalyinSomalia
@UNSomalia
@TC_MogadisuBE
@UNDPSomalia
@MikeNith1
